كسرت خاطري وايد خالتي اليزابيث، الصراحة ما تستاهل، يننوها جناينها من أول ديانا الله يرحمها لي ساروه مرت حماها اللي كانت اتهايت تلايا الليل وخربت ديانا الله يرحمها معها، تتذكرونها سوت الدنق ما أدري وين أراضيها الحين؟ من جناين العيال الين جناين الأحفاد هالميغان اللي هدمت الأولي والتالي، اشبتبدله هالفقيره خالتي؟ على ولدها اللي خذ وحده مو من مواخذيهم، لو على جناينها لو على أحفادها وجناينيهم اللي من مواخذيهم بعد، الداد لها، ما مر عليها يوم حلو نغصوا عليها حياتها!

أنا من أول نظره ما حبيتها هالميغان وخالتي اليزابيث كانت لها نظرة الله يحفظها، مبين على ميغانوه اللعانه من عيونها، وإلا إنتي أحين ماخذه أمير ولد أمير ولد ملكه، عارفه حياته وعارفه التزاماته وعارفه اللي له واللي عليه، وسامعه قصة أمه اللي ما قدرت على هالقيود، يعني المفروض عارفه اللي بتواجهينه هناك وقابله وراضيه فيه، إلا إذا كنت مخططه من الأول إنج تبوقين الولد من أهله واطلعينه بره شورهم، محد اغصبج على هالحياة ولا انت اللي بالمخطوفه و ما حسيتي إلا انتي مرت الأمير، خذتي قرارج بروحج وخذتيه وانت تدرين شالمطلوب منج، سويتيها كانج متفاجئة وكانج ما تدرين وأن هالقيود انحطت عليج بس لأن لونج غير؟ شهالعبو؟

تقول ما عندي خصوصية واهي عايشه بقصر الخيل تسرح وتمرح فيه، اللي يسمعها يقول أول ما تفتح باب غرفتها إلا عيوزها في ويها.

وانت الله يهداك يا هاري بس على أوليك في شور مرتك وقيدك في يدها، صرت سكانه مرته الله يحفظك، قصت عليك وطلعتك من بيتك ومن عيلتك ومن ديرتك بكبرها، يسوه عليك هالبهدله اللي انت فيها؟ و ياريت مستفيد، المقابله كلها حق ملعونة الصير مرتك، انت ما احفظوا لك إلا جملة واحدة، أن أبوك قص عنك المصروف، وع عليك، حتى ما راعيت أن جدك في المستشفى بين الحياة والموت، شنو كنت تتوقع وانت اللي قايل أنا لا اني بولدكم ولا أبيكم ولا أنا بأمير وو ما خليت وما بقيت عن هلك؟ خبز خبزتيه إكليه بالرفله، زين جذي؟ خالتي اليزابث تقول إنها حزينه، لام الله من لامج من يتحمل اللي تحملتيه. يقولون القصر كله اختب من المقابله، والمسؤولين والموظفين مجتمعين من ذيك الليله يفكرون اشلون يرقعون اللي صار، شترقعون الشق عود، والإنجليز كلهم زعلانين من هاري وحاطين في خاطرهم عليه ولا أحد متعاطف معاه، أكيد الصراحه الصوره اللي طلع فيها كلش تفشل، بين فعلاً اشقد مسيطره عليه وأن الراي رايها، ترا هم حتى لو أجانب بعد عندهم رجولة، ما يحبون الريال اللي (خري مري).

وأخيراً انتي يا أوبرا وينفري عاد أنا وايد أحبج بس هالمره سمحي لي عفستي الدنيا الله يهداج ذي مب شطاره ولا هي فن، بس شفيتي وتحيزتي حق اللي من صبغتج وصدقتيها، لا دليل ولا شي عندها يثبت أن اللي قالته صح، ما غير هالريل اللي تالته وراها ويثني على كلامها، زين جذي؟ هكو خالتي اليزابث قلبها معورها من الافتراءات عليها، الله لا يسامحكم على اللي سويتوه.

وبس والله ما نبي نعقر في الأوادم أكثر من جذي احنا ما يخصنا وأخيراً سامحونا يا هل السفاره الله يعين اللي بيترجم لكم!!